O Concello do Incio levou a cabo diversas actividades durante o curso escolar 2023-24 dentro do Programa de conciliación do Concello do Incio, para o que contou con 29.700,00 € de financiamento procedente da Secretaría Xeral de Igualdade da Xunta de Galicia e do Ministerio de Igualdade dentro do “Plan Corresponsables”.

As actuacións consistiron en diversas bolsas de coidados profesionais en dependencias públicas que facilitaron a conciliación familiar e laboral de unhas 25 familias do municipio e case 40 nenos e nenas con atención antes e despóis da xornada lectiva, así como durante as matinais do nadal e dos meses de verán.

Deste xeito, estivo en funcionamento durante os meses lectivos o servizo de madrugadores durante dúas horas diarias antes da xornada escolar, bolsa de coidados despois da xornada lectiva con especialización en diferentes materias (informática, inglés, patinaxe…), un campamento nas semanas de nadal e un campamento de verán durante as mañás dos meses de xullo e agosto.

O Programa de conciliación do Concello do Incio terá continuidade no vindeiro curso escolar 2024-25.