Venres, 19 de xuño de 2020.- O Concello do Incio informa aos veciños e veciñas a través dun Bando da Alcaldía da recollida de residuos voluminosos o vindeiro 1 de xullo.

En concreto, explica que o día 1 de xullo se procederá á recollida de residuos voluminosos que non poden ser depositados no contedor do lixo nin ser recollidos polo camión compactador.

Así, procederase á recollida de colchóns, neveiras, televisores ou lavadoras, entre outros residuos de gran tamaño.

Depositalos o 29 e 30 de xuño

Os obxectos voluminosos dos que os veciños e veciñas queiran desfacerse deberán ser depositados nas inmediacións dos contedores existentes os próximos días 29 e 30 de xuño para a súa recollida o día 1 de xullo.

O Concello do Incio precisa que non se poden depositar noutros días que non sexan os indicados e agradece a colaboración veciñal para retirar este tipo de refugallos.

Xoves, 11 de xuño de 2020.- O Concello do Incio comezou a pasada semana os traballos de roza e acondicionamento das estrada e pistas de titularidade municipal para mellorar o seu estado e contribuír na prevención dos incendios forestais.

Estes días hai varios equipos desprazados en diferentes puntos do Concello. Algúns deles son operarios municipais que se dedican a limpar a maleza co tractor e tamén hai operarios que se ocupan das tarefas a man, que están realizando parroquia a parroquia.

A maiores dos operarios municipais, o Goberno local contratou dous tractores que se ocupan de rozar e acondicionar as estradas municipais.

Os traballos, que seguirán tamén nos vindeiros días ata completar todo o termo municipal, pretenden ademais de acondicionar as estradas municipais e as parroquias, ter os recursos turísticos no mellor estado para a chegada dos visitantes. Deste xeito, farase especial incidencia tamén nas rutas de sendeirismo e nos espazos de recreo e áreas de descanso.

Martes, 2 de xuño de 2020.- O Concello do Incio agradece os traballos de rehabilitación que levou a cabo o Goberno galego na Igrexa da Cruz do Incio, aos que hoxe se suma a resolución no DOG da Dirección Xeral de Patrimonio Cultural pola que se incoa o procedemento para declarar ben de interese cultural a igrexa de Santa Cruz.

A Xunta precisa que a igrexa de Santa Cruz do Incio posúe notables valores arquitectónicos e culturais dunha intensidade infrecuente no conxunto do patrimonio moderno de Galicia, xa que a súa natureza arquitectónica é dunha calidade excepcional debido aos seus valores espaciais, formais e construtivos que acadan un mesmo plano de excelencia.

Posúe, así mesmo, un conxunto moi notable de pezas mobles deseñadas tanto polo propio arquitecto e realizadas por artistas locais como polo escultor José Luis Sánchez Fernández ou o pintor José Luis Gómez Perales, que se integran perfectamente na propia igrexa. Consideran a obra de José Luis Fernández del Amo, proxectada en 1960, “mostra excepcional da arquitectura do Movemento Moderno en Galicia”.

Así, Patrimonio explica que a igrexa de Santa Cruz do Incio “posúe excepcionais valores arquitectónicos e culturais dunha intensidade infrecuente no conxunto do patrimonio moderno de Galicia, xa que a súa natureza arquitectónica é dunha calidade destacable debido aos seus valores espaciais, formais e construtivos que acadan un mesmo plano de excelencia”.

O alcalde, Héctor Corujo, destaca o investimento de 128.947,44 euros que o Goberno galego acometeu para a rehabilitación do templo, traballos aos que agora se suma “esta boa nova”.