O alcalde do Incio, o popular Héctor Corujo, vén de manter a súa primeira xuntanza de traballo desde que foi elixido rexedor co presidente da Xunta, Alberto Núñez Feijóo.

Tras o encontro, que se celebrou no despacho do presidente da Xunta en Santiago, o alcalde agradece a boa disposición do mandatario galego nos asuntos que lle trasladou.

En concreto, Héctor Corujo manifestoulle a importancia de levar a cabo investimentos para o Concello relacionados coa mellora dos servizos sociais e sanitarios e a mellora das infraestruturas, nomeadamente as que teñen que ver co abastecemento de auga.

O rexedor valora a receptividade que amosou o presidente da Xunta, quen lle indicou que pronto se levarán a cabo melloras nos servizos sanitarios complementarios no Concello do Incio.

“Foi unha reunión moi cordial na que lle trasladei aquelas prioridades para as que pedimos a colaboración da Xunta e penso que a resposta do presidente foi moi positiva e que pronto reverterá no noso Concello”, explica Corujo.

Xoves, 29 de agosto de 2019.- O alcalde do Concello do Incio, Héctor Corujo, mantivo unha xuntanza de traballo co presidente da Confederación Hidrográfica do Miño-Sil, José Antonio Quiroga, na que lle propuxo o uso recreativo do embalse de Vilasouto, unha proposta que debe autorizar a CHMS para navegar en augas do seu dominio.

En concreto, o rexedor interesouse pola colaboración da Confederación Hidrográfica do Miño Sil para posibilitar a navegación na lagoa a través de embarcacións sen motor ou propulsadas con motores eléctricos e non contaminantes, o que podería converter ao Concello e aos municipios limítrofes nun punto de ocio acuático e, polo tanto, nun reclamo turístico.

Múltiples opcións

O alcalde explica que as embarcacións de recreo que poidan usar o embalse non poderán ser a motor para non afectar así na auga que os concellos captan para o subministro, como é o caso de Bóveda. O embalse de Vilasouto, sen uso hidroeléctrico, sería un enclave de excepción para a navegación de recreo a través de pequenas embarcacións, piraguas, táboas de páddlesurf, wind surf ou pequenas embarcación a vela ou pedal, entre outras posibilidades.

“Cremos que se trata dun proxecto con moitas posibilidades de ocio e deportivas, o que repercutiría no turismo da zona”, precisa o alcalde.

Héctor Corujo agradece a boa disposición do organismo autónomo do Ministerio de Agricultura, Alimentación e Medio Ambiente e do seu presidente, José Antonio Quiroga, quen se ofreceu a colaborar co Goberno local para avanzar nas posibilidades recreativas do embalse. Ambos acordaron estudar os condicionantes técnicos para poder levar a cabo o proxecto.

Outras demandas

A maiores, tamén abordaron a necesidade do mantemento das infraestruturas competencia da CHMS ao seu paso polo Concello do Incio, como a mellora da estrada que vai de Laiosa á présa ou o desbroce da vía perimetral que conecta Vilasouto e Mosteiró.

Martes, 15 de outubro de 2019.- O Concello do Incio vén de adxudicar a execución da obra de mellora do camiño municipal dende a LU-642 a Bardaos. Os traballos, incluídos no Plan de Mellora de Camiños Municipais de Agader, serán executados pola empresa Ovisa Pavimentos y Obras e contarán cun orzamento de 60.248 euros, dos cales o Concello asumirá o IVE.

As obras de acondicionamento e mellora da vía municipal atópanse no Concello do Incio, na parte norte, e esténdense desde o enlace coa estrada autonómica LU-642 ata as inmediacións de Bardaos. O vial conta cunha lonxitude de 1.600 metros e unha anchura media de 4,30 metros de traza, máis o espazo dedicado a cunetas laterais.

Esta vía municipal conecta o lugar de Bardaos, Santalla, coa estrada autonómica LU-642 e esta coa capital municipal e co Concello veciño de Sarria. Trátase dunha vía que absorbe un importante tráfico de maquinaria agroforestal e que presenta necesidades de mellora da capa de rodadura.

As obrasAs obras consistirán nunha mellora da vía de comunicación que consiste nun reforzo do firme existente coa incorporación dunha nova capa de firme a base de aglomerado en quente tipo D-12 de 6 CM de espesor, máis axeitada ás características do tráfico rodado que soporta.

Proxectase que a vía teña una ancho medio pavimentado de 4,30 metros, adaptándose á traza existente, e xerando a menor alteración posible da paisaxe para minimizar os impactos.

A obra estrutúrase nas fases de limpeza e preparación da pista e pavimentado con aglomerado en quente.

O prazo de execución das obras será dun mes.